Gitg havein nus ponderau tgei che duess capitar culla casa paterna a Sagongn. Ina cooperativa da habitar, aschia la decisiun che nus havein priu en famiglia. Casa, clavau e curtgin duein porscher spazzi da viver a differentas persunas cun spért da cuminonza. Nus essan all’entschatta d’in project participativ ed envidein tei cordialmein da concepir da niev quei liug cun nus.
Martin, Flurin, Andri, Curdin e Maurus Bundi
Foto: Augustin Beeli
Entuorn la davosa midada dil millenni era la Casa Encarden in liug viv. Sut il tetg avdava la famiglia Bundi culs quater fegls. Ils geniturs fagevan il pur sil bein biologic ferton ch’ils affons mavan en ed ora tiel basat e la basatta el plaunterren. Pervia dalla biara lavur en nuegl e sils funs viveva adina puspei fumeglia da lontan e maneivel tier ils Bundis a casa. Ultra havevan nus savens visetas.
La habitaziun affittada enamiez ha giu differentas funcziuns. All’entschatta sco habitaziun da vacanzas, lu sco WG da giuventetgna per snowboardist*as che semiavan dalla cariera professiunala e la fin finala ei ina famiglia cun dus affons secasada lien.
Duront ils davos 35 onns ha ei dau dabia veta en hetta.
Illustraziun: Sophie Frank
Oz ei bia auter. Basat e basatta ein gia morts dagitg, ils geniturs vivan sparti ed ils affons ein sgulai ora. Probabel vegnan era ils affons ella habitaziun affittada beingleiti ad ir lur atgnas vias. Ei daventa calm.
Stalla e clavau han piars lur funcziun oriunda e surveschan sco magasin per tut la sort rauba che s’accumulescha sur ils onns. La substanza architectonica da quei edifeci ei en in stan mal. Tgei che duei capitar cul clavau ei aunc aviert. El pudess porscher niev spazi da viver.
La casa corrispunda buca pli als standards da habitar e d’energia contemporans e duess perquei vegnir sanada precautamein.