Fontauna: Wikipedia – Adrian Michael
In dils bials de tut la Foppa
Gion Cadieli, 1936 (poet romontsch da Sagogn)
Ei finfatg il vitg Sagogn,
Sco en tgina ina poppa
Dorm’el sper il Rein e Glogn.
Circumdaus da tschiens pumera
Che flurescha da smarvegl,
Lunsch naven dalla canera,
Sa’l semiar el clar sulegl.
Sagogn schai en ina planira sur la Ruinaulta. Schebein ch’il vitg ei situaus quiet empau dapersei dalla via principala, dispona el da bunas colligiaziuns. Il traffic public gira mintg’ura entochen zera allas 23.00, duront ils temps da pendularis perfin el tact da mes’ura.
Naven dalla staziun da Valendau/Sagogn entochen Cuera cuoza il viadi cul tren 30 minutas. La ruta che meina ins cul bus via Glion cuoza in’ura. Pil viadi cugl auto entochen Cuera drov’ins mes’ura.
Romontsch ei il lungatg ufficial d’administraziun e scola dalla vischnaunca da Sagogn. Scoletta, scola primara e stizun cun agentura da posta secattan el vitg.
Perquei ch’il territor d’alp dalla vischnaunca da Sagogn s’extenda entochen si els aults dalla regiun turistica da Flem/Laax, retscheivan las habitont*as da Sagogn in abonnament da stagiun reduciu dallas pendicularas.