Martin Bundi – Sagogn
Aunc posseda Martin la casa. El ei bab dils quater fegls Flurin, Andri, Curdin e Maurus.
Martin ei in tipic generalist e «meister canalles». Oz lavura el ella producziun da cumplexs tetgs faldabels da solar. Bugen purschin nus cheu in schatg da sias numerusas occupaziuns: Mecanist d’autos, pur biologic, sviluppader da skis cun rodas, patrugliader da pistas, montader da cundrezs pneumatics, pur da coniv, etc. Il temps liber passenta Martin cun siu canu sil Rein ni ella camona alpina.
Flurin Bundi – Hannover
Flurin ei bab d’ina grondiusa e viva feglia. Dapi la stad 2022 habitescha el cun sia famiglia a Hannover el nord dalla Tiaratudestga.
Flurin ei scolast primar e coach. Actual gauda el il generus congedi per geniturs en Tiaratudestga ed anfla aschia il temps per projects che schain a cor ad el, sco per exempel la Cooperativa Encarden. El ei in idealist e siemia bugen d’in meglier mund.
Andri Bundi – Berna
Andri ei restauratur independent e fa part dil collectiv da restaratur*as Atelier 40a a Berna. Sia secunda passiun ei la musica. El suna ghitara ella band da wave punk zuckerbecker ed organisescha regularmein concerts da punk a Berna. Sco DJ metta el si plattas els locals dentr Genevra e Tersnaus. Andri ei bugen da viadi ed appreziescha la cumpignia.
Curdin Bundi – Cuera
Curdin ei bab d’in fegl carin ed habitescha cun sia famiglia sco sulet dils quater frars puspei el Grischun. El ha studegiau sport ed ha empriu da scrinari da mobilias. Curdin ei seperfecziunaus sil camp dalla pedagogia ed instruescha oz lavurs manilas e sport alla scola secundara. Dasperas lavura el sco trenader persunal el sectur da fitness e sanadad. Curdin ha grondas musclas malgrad ch’el maglia buca caschiel.
Maurus Bundi – Turitg
En in’anteriura fasa da sia veta era Maurus scolast da skis, la perfetga cumpletaziun per in lennari. Oz lavura el en in’instituziun d’agid per toxicomans. Dil reminent s’engascha Maurus pil salvament e la promoziun dil lungatg romontsch. Sch’ei marscha gest nuot viseta el in concert da siu frar Andri.