Idealmein scaffin nus puspei in liug viv nua che carstgauns cun gronda diversitad partan in suttetg in cun l’auter, nua ch’ins s’entaupa ed enconuscha tschel e tschella, nua ch’ins s’occupescha communablamein da casa e curtgin, nua ch’ins pren a mauns ensemen las sfidas e lantschaschescha projects e fiastas da cuminonza. Medemamein duein las habitaziuns e la cuminonza era porscher avunda spazi privat pils basegns individuals. Il mintgagi dallas persunas vegn structuraus da sligiaziuns particas e pragmaticas.
Grazia alla realisaziun consequenta duei nies project da habitar vegnir percipius sco in bien exempel d’ina moda da habitar alternativa ellas muntognas e motivar ulteriurs projects semeglionts. Aschia pudein nus contribuir ina sligiaziun pusseivla alla problematica sil marcau da habitaziuns ella regiun.
Foto: Augustin Beeli
Tgei ei nies motor? Cheu entgins patratgs che motiveschan nus dad ir vias novas:
Jeu vi guder mia pensiun a Sagogn e giavischel pequei spazi da viver senza barrieras.
Martin Bundi
Il posses d’immobilias e sulom muntan per mei ina gronda responsabladad. Quella vi jeu surprender e porscher ina contribuziun constructiva alla problematica da construcziun e planisaziun per habitaziuns en Surselva.
Flurin Bundi
A mi ei impurtont da mussar ch’ei dat alternativas tier la casa d’ina famiglia che funcziuneschan era ellas muntognas.
Andri Bundi
Ussa ch’jeu sundel daventaus bab, sai jeu s’imaginar da puspei viver cun mia famiglia a Sagogn.
Curdin Bundi
Persistenza schai a cor a mi. Perquei giavischel jeu ch’il project vegn realisaus cun ina strategia per in svilup durabel.
Maurus Bundi